براندی کەسیی لە پێنج خولەکدا: لە کوێوە دەستپێبکەم؟

بڵاوکراوەی ئەم هەفتەیە چی لە خۆی دەگرێت:

١.  چۆن و لە کوێوە دەست بکەم بە گەشەدان بە براندی کەسیی خۆم؟  خاڵی دەستپێکم چییە؟

٢.  ئەم شەممەیە ٢/٨ کاتژمێر ٥ ی ئێوارە لە پێشانگای نێودەوڵەتی هەولێر بەخێرهاتنتان دەکەم.

سڵاو هاوڕێ گیان،
هیوادارم زۆر باش بیت،
پێش ئەوەی دەسپێبکەم، دەمەوێت پێتان ڕابگەیەنم کە چەند بڵاوکراوەی داهاتوومان تەرخان دەکەم بۆ باسکردن لە سەرجەم پێکهێنەرەکانی براندی کەسیی و هەر هەفتەیەک جەخت دەخەمە سەر یەکێکیان.  هەموو هەفتەیەک لەگەڵم بن و هەنگا و بە هەنگاو براندی کەسیی خۆمان گەشەپێدەدەین.  پێکهاتەی باسەکەمان بۆ هەر هەفتەیەک بەم جۆرە دەبێت:

پێکهێنەرەکانی براندی کەسیی

١.  ستراتیژیا

٢.  ئامانج

٣.  تارگێت ئەودیەنس

٤.  چەناڵەکانی گەیاندن

جا ڕەنگە هەرکام لەم پێکهێنەرانە زیاد لە هەفتەیەکیان بدەمێ و لەگەڵم بن.  بە هیوای سوودی هەموو لایەکتان

جا با ئێستە دەست بکەین بە ناوەڕۆکی بڵاوکراوەکەمان،

١.  پێکهێنەری یەکەمی براندی کەسیی: ستراتیژیای براندەکەت لە چی پێکدێت؟

ستراتیژیای براندی کەسی لەم بەشانە پێکدێت:
١.  بەها کەسییەکانت

٢.  چیرۆکی کەسییت

٣.  خاڵی لاواز و بەهێزت

٤.  پاراستنی ڕەسەنایەتی

١.١ ستراتیژیا: چۆن بەها کەسییەکانی براندی کەسیی

خۆمان بدۆزینەوە؟

ناکرێت باسی برانی کەسیی بکەین، بەبێ ئەوەی قووڵ ببینەوە لە بەها کەسییەکانی خۆمان.  واتە یەكیک لە پایە گرنگەکانی گەشەدان بە براندی کەسیی خۆمان ئەوەیە کە تێبگەین کە بەها کەسییەکانی خۆمان چییە و لەسەر ئەو بنەمایانە جۆڵەی پیشەیی خۆمان بەکەین.  ئەوەی کە هێز دەبەخشێت بە براندی کەسییت بەها کەسییەکانی تۆن. بەهاکان لە کەسێکەوە بۆ کەسێکی تر دەگۆڕدرێن، تۆ پێویستت بە  گفتوگۆیەکی ڕاست و بێ پێچ و پەنا هەیە لەگەڵ خۆتدا کە ٣ بەهای کەسیی خۆت دیاریی بکەیت.

هەڵە تێگەیشتنێک کە زۆرجار توشی بەشداربوانی پرۆگرامی کۆچینگ دەبێت ئەوەیە کە لە کاتی دیاریکردنی بەهاکانیاندا تەنها بیرییان لە لایەنی پیشەیی و تەکنیکییە، واتە ئەگەر کەسێک ئەندازیار بێت، بەردەوام بەهاکانی دەباتەوە سەر پیشەیی ئەندازیاریی، بەڵام ئەوە هەڵەیە!  بەهاکانی براندی کەسیی خۆت دەبێت بەهای کەسیی بن نەک پیشەیی.  تۆ کار و پیشەکەت لەسەر بەهای کەسیی بنیاد دەنێیت، بۆیە دەبێت بناغەکە بەها کەسییەکانت بن.  بۆیە لەکاتی گفتوگۆ کردن لەگەڵ خۆتدا، وەک مرۆڤ بیر لە خۆت بکەرەوە نەک کارساز یان ئەندازیار یان هەر بوارێک کە کاری تێدا دەکەیت.

ئەی چۆن دەتوانیت سێ بەهای کەسی خۆت دیاری بکەیت؟  ئەم چەن ڕ‌ێگایەی خوارەوە زۆر یارمەتی دەرت دەبێت:
١.  بیربکەرەوە لەو ساتەی تەمەنت کە هەستت بە دڵخۆشییەک و ئارامییەکی دەروونی زۆر کردووە، چ بەهایەکی تۆ گەیاندیتی بەو خۆشحاڵی و ئارامبوونەوەی دەروون و هەست کردن بە بەهاداریت و دەتەوێت هەموو تەمەنت ئەو هەست دووبارە بکەیتەوە؟

٢.  لە ژیانی ڕۆژانەتدا، چ تایبەتمەندییەک یان بەهایەک هەیە کە زۆر گرنگی پێدەدەیت و هەرگیز لێی لانادەیت یان بە پێچەوانەیەوە ڕەفتار ناکەیت؟
٣.  سەرەنجی ئەو کەسانە بدە کە پێیان سەرسامیت و حەزدەکەیت وەک ئەوان بیت، چ بەهایەکیان هەیە کە وا تۆیان عاشق کردووە؟

٤.  لە کەسانی چواردەوەرت بپرسە کە چ بەهایەک لە تۆدا هەیە کە ئەوان پێی سەرسامن و بە خاڵی بەهێزی تۆی دەزانن؟

٥.  یاخود بیربکەرەوە لەو سیفەتەی کە زۆر رقت ڵێیەتی، دەگونجێت پێچەوانەی ئەو سیفەتە بەهایەکی کەسی خۆت بێت.

جا ئێستە ئەوەی پێویست بیکەیت ئەوەیە کە لەگەڵ خۆت دابنیشە و ٣ بەهای کەسی خۆت دیاری بکە، چونکە ئەوە خاڵی دەستپێکی تیگەیشتن و گەشەدانە بە براندی کەسیی خۆت.  لە وەڵامی ئەم ئیمەیڵەشدا، بەهاکانی خۆتم بۆ بنێرە و پێم بڵێ کە بۆچی و چۆن ئەو بەهایەت هەڵبژاردووە با بەیەکەوە لەسەری بدۆێین.

بەم جۆرە تۆ هەنگاوی سەرەتایی و گرنگی براندی کەسیی خۆت دیاری دەکەیت، ڕەنگە ئێستا هێشتا باش تێنەگەیت کە چۆن تەنها ٣ بەها گرنگە بۆ براندی کەسیی خۆت، بەڵام دان بەخۆتدا بگرە، بەرە بەرە تێدەگەیت کە چۆن ئەو بەهایانەت بکەیت پایەیەکی گرنگی براندەکەت.

✅١.١ ستراتیژیا: بەها کەسییەکانی براندی کەسیی

چاوەڕوان بن لە بڵاوکراوەی داهاتوودا باسی

١.٢ ستراتیژیا: چۆن چیرۆکی کەسی دابڕێژم؟ ⌛

ڕۆژی شەممە ٨/٢ کاتژمێر ٥ ی ئێوارە لە پێشانگای نێودەوڵەتی هەولێر بابەتێک پێشکەش دەکەم بە ناونیشانی
”چۆن متمانە دروستبکەین لەڕێگەی براندی کەسییەوە”
هاتن بۆ هەمووانە و خۆشحاڵ دەبم بە ئامادەبوونتان