بۆچی کارۆسێڵ زۆر گرنگە لە لینکدئین؟

لە چ کاتێکدا کارۆسێڵ بەکاربهێنین؟

لەوانەیە ئەمە پرسیاری زۆرێک لە کەسانی پیشەیی و ئەو کەسانە بێت کە بەردەوامن لەگەشەدان بە براندی کەسیی خۆیان لە ڕێگەی دروستکردنی ناوەڕۆکی سۆشیاڵ میدیاوە.
پێش ئامادەکردنی ناوەڕۆکی هەر کارۆسێڵێک، زۆر گرنگە تێبگەیت کە لە کوێ و لە چ کاتێکدا بەکاریان بهێنیت بۆ ئەوەی زۆرترین دەستڕاگەیشتنیان هەبێت و ئامانجی ڕاستەقینەی خۆی بپێکێت:

١. زانیاری و فێرکاری: کارۆسێڵەکان ڕێگەت پێدەدەن ناوەڕۆک دابنێیت بەچەند سڵایدێک کە دەتوانیت بەکاریان بهێنیت بۆ دروستکردنی ناوەڕۆکی وەک فێرکاری، ڕێنمایی هەنگاو بە هەنگاو و باسکردنی ورد و درشتی بابەتێک لە کۆمەڵە سڵایدێکدا بە سادە و ساکاری.

٢. چیرۆک گێڕانەوە: ناوەڕۆکی کارۆسێڵ یارمەتی دروستکردنی چیرۆک و گێڕانەوەیەکی کاریگەر دەدات و دەگونجێت بە سەرنجڕاکێشترین شێوە پیشانی بینەر بدرێت.

٣. ڕێکلام  و ڕاگەیاندن: فرە سلایدی لە ناوەڕۆکی کارۆسێڵ دا ڕێگەت پێدەدات بە کاریگەرترین شێوە بانگەشە و ڕێکلام و ڕاگەیاندن بۆ بەرهەمەکانت بکەیت ئەگەر بابەتی فرۆشتنت هەیە، یان ڕاگەیاندن بۆ پڕۆژە و کارێکت بکەیت کە ئەتەوێ خەڵکێکی ئێجگار باش بزانن کە چیت کردووە و خەریکی چییت. جگە لەوەش دەتوانیت هەندێک زانیاری گرنگ دابنێیت لەگەڵیاندا. 

چۆن ناوەڕۆکی کارۆسێڵێکی کاریگەر ئامادەبکەین؟

هەنگاوی یەکەم: پلانی ناوەڕۆکەکەت دابنێ

بڕیار بدە لەسەر ئامانجی ناوەڕۆکی کارۆسێڵەکەت دەتەوێ کە چ جۆرە ناوەڕۆکێک بڵاوبکەیتەوە فێرکاری بێت، ڕێکلام بێت یان بەها بەخشین بێت لەڕێگەی چیرۆکگێڕانەوەیەکی براندی کەسیی خۆت.

هەنگاوی دووەم: دیزاینی سەرنجڕاکێش و بەردەوام بەکاربهێنە

مەبەست لە بەردەوام ئەوەیە کە خوێنەر بزانێت کە کۆمەڵێک سڵاید بەیەکەوە تەواوی ماناکە دەدەن و هان بدرێت بە گۆڕینی سڵایدەکان. 

زۆر گرنگە دیزاینێکی جوان و سەرنجڕاکێش دروستبکەیت بۆ ناوەڕۆکەکانت و واباشترە براندینگێکت هەبێ کە لەسەر کارۆسێڵەکەتدا بەکاریبهێنیت بۆ ئەوەی ناوەڕۆکەکانت بناسرێتەوە و پڕۆفایلێکی سەرنجڕاکێش بۆ براندی کەسیی خۆت دروستبکەیت .

هەنگاوی سێیەم: با سڵایدەکانت وەکو زنجیرەیەک کاربکەن

لە هەر سڵایدێک دا پێویستە شتێکی کاریگەری تێدابێت کە هەستی تامەزرۆبوون و چاوەڕوانی لە بینەردا دروست بکات بۆ ئەوەی کاریگەرییەکی ئەرێنی لەسەر دروست بکات و بەردەوام بێت لە خوێندنەوەی.

بە نموونە: ئەگەر چیرۆکێکی کەسیی دادەڕێژیت لە چوارچێوەی کارۆسێڵێکدا چیرۆکەکە دابەش بکە بەسەر سێ ئاستدا (سەرەتا، ناوەڕاست، کۆتایی) هەر ئاستێک لە چیرۆکەکە دابەش بکە بەسەر چەند سڵایدێکدا، با خوێنەر هەستی چاوەڕوانی ئەنجامێک بێت لە کۆتاییدا وە بێزار نەبێت و سڵایدەکان بەگشتی پەیوەست بن بە دەرخستنی ئامانج و دەرەنجامێکەوە.

هەنگاوی چوارەم : قولاپ (هوک) کاریگەر لە سڵایدی یەکەم دا بەکاربهێنە

سڵایدی یەکەم بڕیار دەدات کە ئاخۆ بینەر بەردەوام دەبێت یاخو نا!  

هەنگاوی پێنجەم: بەکارهێنانی Call to Action (CTA)

ئەگەر توانیت بینەر تا کۆتایی لەگەڵ خۆت بهێڵیتەوە، پێویستە کە سەرمایەگوزاری بکەیت تیایدا، واتە دڵنیابەرەوە لەوەی کە سڵایدی کۆتاییت بانگەوازێکی ڕوون و ئاشکرای هەیە بۆ کردەوەیەک کە بە ئینگلیزی پێی دەوترێت Call To Action کورتکراوەکەی بریتییە لە CTA وەک:

“ئەم پۆستە لای خۆت سەیڤ بکە”، “هاوڕێیەکت تاگ بکە”، یان “کۆمێنت بکە تاکو لینکی ئەو بابەتەت بۆ بنێرم”، لە کۆتایی دا پێویستە هانی بینەر بدەیت کە سەیڤ بکەن، کۆمێنت بکەن یان هاوبەشی بە ناوەڕۆکەکەت بکەن، واباشترە شتێکی سوودبەخشی تێدابێت بۆ ئەو نەک تەنها داواکردنێک بێت وەکو ئەوەی کە هەمیشە ئێمە دەڵێین:
لە کۆمێنت بنووسە “براندی کەسیی” تاکو لینکی درێژکراوەی ئەم بابەتەت بە نامە بۆ بنێرم.

کە ئەمە CTA ێکی زۆر کاریگەرە بۆ بەکارهێنان چونکە دیسانەوە بە تامەزرۆییەوە کۆمێنت دەکات ئەگەر لە بابەتەکە سوودمەند بووبێت چاوەڕوانی سوودێکی زیاترت لێدەکات و لە کۆتاییدا سوودگۆڕکێ دەبێت.

هەنگاوی شەشەم: نووسینی Caption 

ئەمە هەنگاوێکی گرنگ و پێویستە کە کاپشنێکی کاریگەر بنووسیت کە پۆستەکەت کورت بکاتەوە یان بەهایەکی پۆستەکە دەربخات کە لەوانەیە ببێتە هۆی زیادکردنی بینەرەکانت. دڵنیابەرەوە کە لە کاتی پۆستکردنی کارۆسێڵدا، کاپشنەکە زۆر دوور و درێژ نییە.

چونکە هەندێ کەس لە ناوەڕۆکدا یەکەم شتێک سەرنجی بدەن کاپشنە ئەگەر کاپشنێکی کاریگەر نەبێت ڕایان بگرێت لەسەر کارۆسێڵەکە ئەوا زۆر بەسادەیی سکرۆڵی دەکەن.

 هەنگاوی حەوتەم: شیکاری داتا

دوای بڵاوکردنەوەی ناوەڕۆک پێویستە شیکاری و بەدواداچوون بۆ کارایی (Performance) کارۆسێڵەکەت بکەیت، لایک و کۆمێنت و شەیر و سەیڤ و گەیشتنی ناوەڕۆکەکەت ببینە، بینەرەکانت هەڵبسەنگێنە بە یارمەتی بەشی Insights تاکو بتوانیت بەردەوام ستراتیژی داڕشتنەوەی ناوەڕۆکەکانت باشتر بکەیت.