براند ئارکیتایپ : چۆن ١٢ جۆری کەسایەتی براند دەتوانن براندی کەسیی تۆ هەڵبسەنگێنن؟

جۆرەکانی براند ئارکیتایپ:

١- The Creator – دروستکەر
ئارکیتایپی براندی دروستکەر پەیوەستە بە داهێنان و گەشەپێدان، ئامانجی بریتییە لە چارەسەرکردنی کێشەیەک بە داهێنانی شتێک کە پێشتر نەبووە بەردەوام هەوڵدەدەن بەرهەمی مانادار بە بەهای بەردەوام دروست بکەن کە لەگەڵ دیدگای براندەکەیاندا بگونجێت.

ئەدۆب لە جیهاندا پێشەنگی نمونەکانی ئارکیتایپی دروستکەرە کە بەردەوام تەکنەلۆژیای نوێ تێکەڵ بە بەرهەمە سۆفتوێرییەکانی دەکات.

٢- The Sage – حەکیم
ئەم براندانە نەک بەتەنها هەوڵدەدەن بەدوای زانیاری بەبەهادا بگەڕێن، بەڵکو هاوبەشی پێدەکەن لەگەڵ کەسانی دیکەشدا.
ئامانجی ئەم براندە باشترکردنی خەڵکە بۆ گۆڕینی جیهان نەک گۆڕانکارییەک لەسەر خۆیان.
خەڵکی پشتیان پێدەبەستن بۆ ئەوەی باشتر لە جیهانی دەوروبەریان تێبگەن. هەر لەبەر ئەمەشە گروپێکی بەئامانجگیراوی دڵسۆزیان هەیە کە بەردەوام دەگەڕێنەوە سەر ئەزموون و سەرچاوەکانیان.

BBC وەک یەکێک لە گەورەترین کۆمپانیاکانی هەواڵ و میدیا، خۆی وەک براندێک بۆ زانیاری ڕاستەقینە و متمانەپێکراو سەبارەت بە ڕووداوەکانی ئێستا لە سەرانسەری جیهان جێگیر کردووە.
هەر لەو ناوەڕۆکانەی بەرهەمی دەهێنن و تەنانەت ئەو هەڵمەتە ڕیکلامیانەی کە دروستی دەکەن، هەموو ئەو شتانەی کە دەیکات، بۆ یارمەتیدانی خەڵکە بۆ تێگەیشتنێکی باشتر و دروستتر لە جیهان.

٣- The Caregiver – چاودێر
ئەم ئارکیتایپە بریتییە لە کارەکتەری پەروەردەکار و پارێزەر و یارمەتیدەر ئەمەش وادەکات کە براندەکەی کەسایەتییەکی میهرەبانی هەبێت بۆ چاودێری تەندروستی و کۆمپانیا قازانج نەویستەکان و ڕێکخراوە ژینگە دۆست و ئاژەڵ دۆست و خۆبەخشییەکان.
ئامانجی ئەم جۆرە ئارکیتایپە لە چوارچێوەی ڕێکخراوە قازانج نەویستەکان بریتییە لە پاراستنی ژینگە و گیانلەبەران کە وایان لێبکات هەست بە پارێزراوی و سەلامەتی بکەن. ڕۆڵی کەسایەتییەکی دڵسۆز و چارەسەرکەر یان کارەکتەرێکی وەکو دایک بۆ منداڵەکەی دەگێڕن کە بەبێ هیچ بەرژەوەندییەک لە دڵەوە کاردەکات.

WWF کە ڕێکخراوێکی جیهانی قازانج نەویستە، نموونەیەکی گەورەیە بۆ ئارکیتایپی Caregiver کە خۆنەویستانە کاردەکات بۆ پاراستنی گیانلەبەرە کێوییەکان و سروشتی ژینگە.

٤- The Innocent – پاکیی
ئەم ئارکیتایپە سادەیی و پاکی و هەستکردن بە گەشبینی بەرجەستە دەکات، نایانەوێت زیان بە هیچ کەس یان هیچ شتێک بگەیەنن، دیدگا و تێڕوانینێکی ئەرێنییان هەیە بۆ ژیان

براندی دۆڤ بە کارکردن لەژێر ناوی کەمپەینی “جوانی ڕاستەقینە” گرنگی بە بڵاوکردنەوەی هەستی خۆشی و گەشبینی و ئەرێنی دەدەن.

٥- The Jester – گاڵتەجاڕ
ئەم ئارکیتایپیە حەزی لە پێکەنین و بەسەربردنی کاتی خۆشە. ئەم براندانە شتەکان زۆر بە جددی وەرناگرن، و هانی خەڵک دەدەن کە لەگەڵیان پێبکەنن.
ئامانجی ئەم ئارکیتایپە یارمەتیدانی خەڵکە بۆ وازهێنان لە بیرکردنەوە سترێسییەکان و دوورکەوتنەوە لە خەم و جەنجاڵی ژیان و وەرگرتنی کەمێک خۆشی
ئەم جۆرە ئارکیتایپە تەنها لەو ساتەدا دەژین کە تێیدان لەوە تێگەیشتوون کە ژیان تێدەپەڕێت و پێویستی بە پێکەنین و وەرگرتنی خۆشی هەیە

براندی M&M’s نموونەن بۆ ئەم جۆرە ئارکیتایپە، ڕیکلامەکانیان پڕن لە خۆشی و گاڵتەئامێز و کارەکتەرەکانیان بەردەوام خۆشی دەبەخشن و خەڵک دڵخۆش دەکەن.

٦- The Lover – خۆشەویست
ئارکیتایپی براندی خۆشەویست بریتییە لە دروستکردنی پەیوەندی قووڵ و سۆزداری. وە بەدوای دروستکردنی پەیوەندییەکی ماناداردا دەگەڕێن.
کڕیارەکانی ئەم جۆرە ئارکیتایپە بە لایەنی هەست و سۆزدارییەوە پەیوەست دەبن بە براندەکەوە, لەسەر بنەماکانی جوانی و لوکس دروست دەبن

Dior کە خاوەنی براندێکی لوکسە بە بەرجەستە کردنی وردی و جوانی بە فۆڕمە جیاوازەکانی لە بەرهەم و خزمەتگوزارییەکانی نمونەیە بۆ ئەم جۆرە ئارکیتایپە.

٧- The Hero – پاڵەوان
ئارکیتایپی پاڵەوان بریتیە لە هەوڵدان بۆ تێپەڕاندنی ئاستەنگییەکان بە نیشاندانی هێز و ئیرادە بۆ ئەوەی جیهان بکەن بە شوێنێکی باشتر یان زاڵبوون بەسەر چاڵنجەکان و سەلماندنی بەهای خۆیان

براندی Nike لە ژێر دروشمی ‘Just Do It’ بۆ وەرزشوانان و بە دەرخستنی کاریگەری بوێری نمونەیە بۆ ئەم جۆرە ئارکیتایپە.

٨- The Explorer – گەڕیدە
ئارکیتایپی براندی ئێکسپلۆرەر بریتییە لە کارەکتەری گەڕیدەیەک کە گەڕان بەدوای ئەزموونێکی نوێ و ئازادی و سەربەخۆیی بە بەبەهایەکی گەورە دەزانن، بەردەوام هانی خەڵک دەدەن چێژ لە ژینگەی دەرەوە وەربگرن، پاڵنەر و یارمەتیدەری خەڵکن کە لە Comfort Zone ی خۆیان دەربچن و بەدوای ئەزموونی نوێدا بگەڕێن

براندی Jeep لەژێر دروشمی Jeep’s Go Anywhere, Do Anything وێنایەکی بەم جۆرە ئارکیتاپە بەخشیوە.

٩- The Magician – جادووگەر
ئارکیتایپی براندی جادووگەر بریتییە لە دروستکردنی ئەزموونی گۆڕانکاری و کردنی کاری مەحاڵ، ئەوان بایەخ بە داهێنان و تێکەڵکردنی ژینگەی خەیاڵ بە واقیع دەدەن وە هەوڵ دەدەن بۆ هێنانەدی گۆڕانکاری ئەرێنی
هەستی سەرسوڕمان بۆ کڕیارەکانی دروست دەکات وە ئیلهامبەخشە و هاندەرە بۆ شێوازی نوێی بیرکردنەوە چونکە لەسەر بنەمای داهێنان و خەیاڵ دروست بووە.

براندی دیزنی نموونەیە بۆ ئەم جۆرە ئارکیتایپە بە گێڕانەوەی چیرۆکی ئەفسوناوی و وەرگرتنی ئەزموونە سیحراوییەکانی بەشێوازی فیلم و گەیاندنی بە بینەر.

١٠- The Rebel – یاخیبوو
ئارکیتایپی یاخیبووەکان بریتییە لەو کارەکتەر براندەی کە شکاندنی دەستوور و یاسا و تەحەدای گۆڕینی دۆخی ئێستا و گۆڕانکاری ڕیشەیی بە بەهایەکی گەورە دادەنێن و لە بوێری و یاخیبوون ناترسن، هەوڵدەدات دۆخی ئێستا تێکبدات بۆ ئەوەی خەڵکی بەدوای بەدیلێکی نوێ دا بگەڕێن و ڕوویان لێ بکات لە پڕۆسەکەدا, لەسەر بنەمای ئازادی و بوێری دروست دەبن

براندی هارلی دیڤیدسۆن خۆی لەسەر ئارکیتایپی یاخیبوون دامەزراندووە، بە پەیامی یاسا شکێنی ناوبانگی دەرکردووە. هارلی وەک کارەکتەرێکی گەورە خۆی ناساندووە بەرامبەر ڕۆتینی ژیان کە سەربەخۆیی و تاکەکەسیی خۆیان لە ڕێی دەستکاریکردنی ماتۆڕسکیلەوە نیشان دەدەن هارلی دیڤیدسۆن خۆی وەک شۆڕشگێڕێک و یاخیبوویەک نیشان دەدات.

١١- Everyman – سادە و بەدڵی هەمووان
ئەم ئارکیتایپە بریتییە لە پەیوەندی کردن لەگەڵ خەڵکی ئاسایی و دروستکردنی هەستی پێکەوەبوون، ئەو کارەکتەرە پەیوەندیدارەیە کە هەمووان هەست بە ئاسوودەیی دەکەن لەگەڵیاندا ئەم جۆرە ئارکیتایپە سروشتی زۆربەی براندە کەسییەکانە کە یارمەتی خەڵک دەدات بە پاڵپشتیکردن و گێڕانەوەی چیرۆکی ژیان و ئەزموونە سەرکەوتووەکانیان ئەم جۆرە براندە بەزۆری سەرنجی ئەو کەسانە ڕادەکێشن کە لە خوار ئاستی بەرز(لوکس) دەژین بۆ ئەوەی لە بەهای ئەو نرخە تێبگەن کە لە پڕۆسەکەدا بەدەستی دەهێنن.

براندی IKEA براندێکی کەلوپەلی ناوماڵە لە ژێر دروشمی “ناوماڵێکی جوان بۆ هەموو کەس” خزمەتگوزاری کەلوپەلی ناوماڵ پێشکەش بە خێزان و خانەوادەکان دەکات بۆ دەستەبەرکردنی ژیانێکی سادە و ئاسوودە.

١٢- Ruler – سەرکردە
ئارکیتایپی براندی Ruler سەبارەت بە کۆنترۆڵکردن و سەرکردایەتیکردنە. ئەوان بەها بە ڕێکخراوەیی و سەرکردایەتی دەدەن، هەوڵدەدەن بۆ وەرگرتنی بەرپرسیارێتی و متمانە بۆ دەستەبەرکردنی سەقامگیری لە بزنس و دروستکردنی بەرهەمی کوالێتی بەرز بۆ سەرکەوتن.

براندی مێرسیدس – بێنز لە ژێر دروشمی The best or Nothing شکۆمەندی و لوکس و گرانبەهای بەرهەمەکانی براندەکەیان دەگەیەنن بە بینەر و نوێنەرایەتی ڕێکخستن و خزمەت بەو کەسانە دەکەن کە سەقامگیری و پێگە بە نرخ دەزانن، وە سەرنجی بەکارهێنەران ڕادەکێشن بۆ پیشاندانی هێز و کاریگەریەکەیان.

لە کۆتاییدا براند ئارکیتایپ دەبێت هەستێک بێت کە کارەکتەری تۆ لە کۆی ژیانتدا دەیخاتەڕوو.

ئەو کارەکتەرەی کە هەڵتبژاردووە نابێت تەنها لە سۆشیاڵ میدیادا دەربکەوێت، بەڵکو دەبێت لە هەموو کایەکانی ژیانی کەسی و پیشەییتدا ڕەنگ بداتەوە. هەر لە بەرکەوتنەکانی ڕۆژانەتەوە تا چاوپێکەوتن و مامەڵەکانت، لە شێوەی قسەکردنت تا ڕەفتار و هەڵسوکەوتەکانت، هەموو گوفتار و ڕەفتارەکانت دەبێت گواستنەوەی هەمان کەسایەتی بێت.
یەکبوونی ئەو هەستە لە هەموو کایەکانی ژیانتدا وادەکات کە براندێکی کەسیی ڕەسەن و باوەڕپێکراو دروست بکات.
کاتێک ئەوەی لە پلاتفۆرمە دیجیتاڵییەکاندا پیشانی دەدەیت هاوتایە لەگەڵ ئەوەی لە ژیانی ڕاستەقینەدا دەبینرێیت خەڵکی ئەم یەکبوونە هەست پێدەکەن و متمانەیان بۆ دروست دەبێت. ئەوان دەزانن کە تۆ کەسێکی دووڕوو نیت، بەڵکو کەسێکی ڕەسەن و ڕاستەقینەیت کە بەبەها و کەسایەتی خۆی دەژی.

براند ئارکیتایپ بۆیە تەنها ستراتیژییەکی مارکێتینگ نییە بۆ سۆشیاڵ میدیا، بەڵکو فەلسەفەیەکە بۆ ژیان ئەوە ڕێگەچارەیەکە بۆ ئەوەی لە هەموو دەرکەوتنێکدا خۆت بیت، بێ ئەوەی ماسکێک دابنێیت یان ڕۆڵێک دیاری بکەیت. کاتێک ئارکیتایپەکەت دەبێتە بەشێک لە ناوەڕۆکی ژیانت، ئەوە چیتر هەر بە براند نامێنێتەوە، بەڵکو دەبێتە ناسنامەی ڕاستەقینەی تۆ.