ناوەندەکانی گواستنەوەی بەهاکانی براندی کەسیی کامانەن؟

١. ناوەندی نووسین

نووسین یەکێکە لە کاریگەرترین ناوەندەکان بۆ گەیاندنی بەهاکانی براندی کەسیی، بەشێوازێکی قوڵ و درێژخایەن کاردەکات بۆ ناساندنی بیرۆکە و تواناکانت چونکە ڕێگایەکی باوەڕپێکراوە بۆ ناساندنی تواناکانی تۆ، دەتوانیت لە ڕێگەی ئەزموون و چیرۆکە کەسییەکانتەوە پەیوەندی لەگەڵ خوێنەر دروست بکەیت هەر بۆ نموونە کتێبی Start with Why بووە هۆی ناساندنی سایمۆن سینەک لە بواری سەرکردایەتی و پەرەپێدانی کەسیی، وە تەنانەت پێش هاتنی سەردەمی دیجیتاڵی و سۆشیاڵ میدیا کتێب تاکە ناوەندی سەرەکی بوو بۆ دروستکردنی براندی کەسیی و گەیاندنی بیرۆکەکان بە خەڵکی زۆرێک لە کارەکتەرە مێژووییەکان تەنها لە ڕێگای کتێبەوە توانییان ناوی خۆیان بنووسنەوە لە مێژووی براندی کەسیی دا و براندی کەسیی خۆیان لە

پێش چاوی ئێمەدا دروستکردووە.
وە هەروەها نووسین لەسەر شێوازی وتار و بڵۆگ دەتوانێت لە پەیوەندییەکی بەردەوام و کاریگەردا بتهێڵێتەوە لەگەڵ گروپە بە ئامانجگیراوەکانت.

٢. ناوەندی دەنگ
ناوەندی دەنگ وەک بەشداری کردن لە پۆدکاست یەکێکە لە ناوەندە کاریگەر و هەست بزوێنەکان بۆ گەیاندنی بیرۆکە و پەیامەکانت, گوێگر دەتوانێت هەستت پێبکات وە ناوەندێکی باشە بۆ پیشاندانی کەسایەتی و شێوازی گفتوگۆ کردنت.

٣. ناوەندی سۆشیاڵ میدیا

سۆشیاڵ میدیا یەکێکە لە بەهێزترین و باوترین ناوەندە کاریگەرەکانی ئەم سەردەمە بۆ گەیشتنی سەرجەم بەهاکانی براندە کەسییەکەت چونکە دەتوانیت بەخێرایی بگەیت بە ژمارەیەکی زۆر لە خەڵک وە دەتوانیت ناسنامەیەکی پیشەیی تایبەت بە براندە کەسییەکەت دروست بکەیت، سۆشیاڵ میدیا تەنها ناوەندێک نییە بۆ پەیوەندی بەڵکو کۆکەرەوەی سەرجەم بەشەکانی میدیایە(نووسین، گرافیک، دەنگ، ڤیدیۆ) ئەم شێوازی کۆکردنەوەیە کاری دروستکردنی ناوەڕۆکی ئاسانتر و کاریگەرییەکەی زیاتر کردووە و بەکارهێنەر دەتوانێت لە یەک شوێندا چەندین جۆری جیاوازی ناوەڕۆک بگەیەنێت.

وە هەروەها بواری ئەوەی نەهێشتۆتەوە کە بەکارهێنەران بڵێن من حەزم لەم جۆرە ناوەڕۆکە نییە چونکە ئەلگۆریزمەکانی سۆشیاڵ میدیا بەشێوەیەک داڕێژراوە کە هەموو جۆرەکانی ناوەڕۆک تێکەڵ دەکات ناوەڕۆکەکان بەگشتی وا دابەش دەکرێن کە بەکارهێنەر چەندین ناوەڕۆکی جیاواز دەبینێت و وە هەموو جۆرەکانی ناوەڕۆک لە سۆشیاڵ میدیاش دا جێگەیان دەبێتەوە.

هەریەک لەم ناوەندانە سوود و کاریگەری خۆیان هەیە، باشترین ڕێگا ئەوەیە کە تێکەڵەی کۆمەڵێک لەوانە بەکاربهێنیت بەپێی ئامانج و سەرچاوەکانت.

هەڵبژاردنی ناوەندە گونجاوەکان :
لە جیهانێک دا کە چەندین ناوەندی گەیاندنی پەیام و بەها هەیە، هەڵبژاردنی ناوەندی گونجاو دەبێتە کلیلی سەرکەوتنی براندە کەسییەکەت، بەلام بۆئەوەی هەڵبژاردنەکەت بەشێوازێکی درووست ئەنجام بدەیت پێویستە وەڵامی ئەم چەند پرسیارەی خوارەوە بدەیتەوە :
بۆ کێ قسە دەکەیت ؟
پێویستە سەرەتا بزانیت بۆ کێ قسە دەکەیت ؟

گروپی بە ئامانجگیراوت کێ یە ؟

ئایا چ تەمەنێکن ؟

وە لە چ پێگەیەکدان ؟

هەر کۆمەڵەیەک لەمانە ڕێگای گونجاوی خۆیی هەیە کە پێویستە کاری لەسەر بکەیت و دەستنیشانی بکەیت.چ بەهایەک دەگەیەنیت ؟پاشان دەبێت بزانیت چ بەهایەک دەگەیەنیت ؟

بەها سەرەکییەکانی براندە کەسییەکەت چییە ؟

ئایا زانست و شارەزاییەکە یان کەسایەتی و جیاوازی ؟

هەر بەهایەک پەیوەندی جیاواز لەگەڵ ناوەندەکاندا دروست دەکات بە نموونە کتێب و وتار ناوەندێکی باشتر و کاریگەرترن بۆ گەیاندنی زانست و بیرۆکەی قووڵ لە کاتێکدا سۆشیاڵ میدیا باشترە بۆ نیشاندانی کەسایەتی و کارلێکی ڕاستەوخۆ.
چۆن دەیگەیەنیت ؟

کاتێکیش دێتە سەر پرسیارە گرنگەکەی چۆن بیگەیەنیت دەبێت ناوەندەکان بەپێی دوو فاکتەری سەرەکی هەڵبژێرین ئەوانیش: کاریگەری و سەرچاوە، بە نموونە کتێب و پۆدکاست کاریگەری قوڵ و درێژخایەنیان هەیە و سەرچاوەی زیاتری پێویستە، لە بەرامبەردا سۆشیاڵ میدیا کاریگەرییەکەی کورتخایەنترە و سەرچاوەی کەمتری پێویستە.

لە کۆتایی دا باشترین ڕێگە تێکەڵەیەکە لە هەموویان لەوانەیە زۆرکەس بکەونە ئەو هەڵەیەی کە تەنها یەک ناوەند هەڵبژێرن، بەڵام ڕاستییەکەی ئەوەیە کە تێکەڵەیەک لە ناوەندە جیاوازەکان کاریگەرترە، وە پێویستە ئەم هەڵبژاردنە وەک بەشێک لە ستراتیژییە گشتییەکەی براندی کەسیی سەیربکرێت هەر ناوەندێک کە هەڵی دەبژێریت دەبێت یارمەتیدەری گەیشتن بە ئامانجە گشتییەکانی براندە کەسییەکەت بێت.

بۆچی ناوەندی سۆشیاڵ میدیا لەمڕۆدا کاریگەرترین ناوەندە بۆ گەیاندنی پەیامەکانی براندی کەسیی بە کارسازان و کەسانی پیشەیی ؟

سۆشیاڵ میدیا پلاتفۆرمێکی سەرەکی و کاریگەری گەیاندنی براندی کەسییە بەشێوازێکی خێرا و بووەتە باشترین ناوەند بۆ گەیاندنی پەیام و بەهاکانی براندی کەسیی بۆ کارسازان و کەسانی پیشەیی لەمڕۆدا ئەم ڕاستییەش لە چەند هۆکارێکەوە سەرچاوە دەگرێت:

گەیشتن بە ژمارەیەکی زۆر لە خەڵک
سۆشیاڵ میدیا ڕێگە دەدات بە گەیشتنت بە هەزاران تاکو ملیۆنان کەس وە بوونی پلاتفۆرمی جیاواز بەپێی تایبەتمەندی کەسایەتی و بەهاکانی براندە کەسییەکەت.

کارلێکی ڕاستەوخۆ
سۆشیاڵ میدیا ڕێگە دەدات بە گفتۆگۆی ڕاستەوخۆ لەگەڵ گروپە بە ئامانجگیراوەکانت ئەم کارلێکە باوەر و پەیوەندییەکی بەهێز دروست دەکات.
نیشاندانی شارەزایی
دەتوانیت شارەزایی و ئەزموونی خۆت لە سۆشیاڵ میدیا دا پیشان بدەیت.

هەڵسەنگاندن
سۆشیاڵ میدیا لە ڕێگەی ئامرازی تایبەتەوە هەڵسەنگاندنی ئاماری وردت پێدەدات بۆ هەڵسەنگاندنی کاریگەری پەیام و بڵاوکراوەکانت لە ڕێگەی بینینی ئەوەی کە پەیامەکانت گەیشتووە بە چەند کەس و چەند کەس کارلێکیان لەگەڵ کردووە و هاوبەشییان کردووە.

خێرایی و گونجاوی
سۆشیاڵ میدیا ڕێگە دەدات بە گەیاندنی پەیام و بەهاکانت بە خێراترین شێوە و کەمترین کات.

بە کورتی سۆشیاڵ میدیا وەکو مایکێکی جیهانی کاردەکات کە ڕێگە دەدات بە هەموو کەس کە دەنگ و بیرۆکە جیاوازەکانی بگەیەنێت بە جیهان .

لە کۆتاییدا براندی کەسیی تەنها بریتی نییە لە کۆمەڵێک بەها بەڵکو هونەرێکی زیرەکانەی مامەڵەکردن و پەیوەندیکردنە لە ڕێگەی ناوەندە گونجاوەکانەوە، هەریەکە لەو ناوەندانەی باسمان کرد سوود و تایبەتمەندی خۆیی هەیە، هەڵبژاردنیان بەندە بە ئامانج و سەرچاوە و کەسایەتی خۆتەوە.
ئێستا بڕیارت داوە چی بکەیت ؟ ئایا دەتوانیت تێکەڵەیەک لەو ناوەندانە هەڵبژێریت بۆ براندە کەسییەکەت ؟
بەڵام لەبیری مەکە کاریگەری براندەکەت لە بەردەوامی و ڕاستەقینەکەییەتی .